السلام عليكم ورحمة الله وبركاتهالإخوة في نقابة المحامين , كل عام وأنتم بخير مقدماً وشكرأ للآدمن لقبولي هنا وده أول بوست لي معاكم .
 |
| مقترح انشاء موقع الكتروني قانوني للمحامين والقانونيين |
الفكرة انه نعمل موقع إلكتروني سهل وبسيط وسريع مثل موقعكم موقع قانون العرب , يعني ألوانه ماكتيرة زي طريقة قوقل , بس امكانياته البرمجية تكون ممتازة ويكون محمي كويس وآمن ودي مسئوليتي إن شاء الله .
حايكون فيهو مقالات قانونية عن كل القانون السوداني مثلاً القانون الجنائي , قانون الأراضي , قانون الأحوال الشخصية وقانون الإستثمار وغيرو برضو ممكن الزول يبحث بمفاتيح الكلمات لأنه مرات بكون المشترك أو الزائر ماعارف القانون البفتش عليه تحت أي بند وحاتتشكل لجنة من المحامين هنا تكون مسئولة عن الموافقة على المقالات البكتبوها المحامين نفسهم على أساس إنه أي حاجة تنزل في الموقع تكون مؤكدة مية في المية , وطبعاً مرات بتغير قانون أو بتتضاف عليهو نقاط تانية أو يتلغي تماماً , فبواسطة المتفاعلين في المجموعة دي والموقع وموافقة اللجنة أنا كمسئول عن الجانب الفني حا اعمل التغيير اللازم .
دي خطوط عريضة للمشروع وأهدافه لكن حاتكون مفصلة أكتر لو الناس اتفقت انه المشروع ده مفروض يبدو فيهو .
المحامين في جدة حايشتركو وحايكون مسجل بياناته كاملة , مثلاً اسمه وعنوانه وإيميلو وتلفونه ونبذة عنه وعن خبراته وشهاداتو وصورتو وفي أي مدينة وأكتر حاجة بشتغلها مثلا ممكن يكتب بشتغل أراضي أو متخصص أحوال شخصية , ممكن مثلاً جنائي , ودي ممكن تسهل حاجات كتيرة مثلاً محامي عندو قضية في مدني وهو من الخرطوم , فبطريقة سريعة ممكن يفتش محامي من مدني ويتواصل معاهو وبرضو ممكن يصل للمحامي المتخصص في الحاجة المعينة مثلا لو عاوز محامي بتاع احوال شخصية ممكن يستعرض المحامين الفي مدني وبشتغلوا احوال شخصية ولو اراضي أراضي عشان يكون البحث سريع والتواصل فعال .
المشاركين في الموقع والزوار حايكون عندهم طريقة اضافة أسئلة , مثلا واحد عاوز يعمل اسم عمل في الخرطوم , فبنشر اللكلام ده وببدو المحامين في الرياض التابعين للمنطقة اللهو عاوز يعمل فيها الشغل , او اي منطقة تانية طالما بقدر يعمل الحاجة الهو عاوزا, يجابوهو وممكن بعد داك هو يتواصل مع المحامي البختارو عشان يعمل ليهو الشغل الهو عاوزو , طبعاً قصة الأتعاب وإنها تكون محددة دي أنا حسب وجهة نظري بخليها للإتفاق البتم بين المحامي والزول العاوز منه خدمة لأنه كل حالة بتختلف من حالة وفي ناس عندهم نفس الغرض لكن زمن الشغل بتاعهم بختلف والجهد أكتر .
الموقع برضو بوفر ثقة كبيرة للمستثمرين الجايين من برة , لأنه معظمم بتوه وبتراجع بالحاجات البسمعها من العامة وماعندها مرجع قانوني , فلما يلقى أجوبة شافية وتعامل قانوني بتشجع إنه يمشي في موضوعه طالما إنه بتشرف عليهو جهة قانونية متخصصة في نوع الإستثمار او الاعمال البقوم بيها .
الموقع حاتكون فيهو آليه انه المشتركين غير المحامين لو أضافو استفسار مثلا , الرد فقط يكون من المحامين أو الزول النزل الاستفسار يعني أي مشاركات من باقي المشتركين والزوار مابكون ليها مكان عشان ماتبقى قصص من ناس مامتخصصين .
الموقع ده انا بإذن الله لو ربنا سهل والفكرة عجبتكم واجتمعنا مع اللجنة البترشحوها من المجموعة وناقشنا التفاصيل ووضعنا الخطة , ممكن يدشن بالكتير في ستة شهور بعد الموافقة والاتفاق ولمدة ستة شهور شغال بس تحت التجربة , يعني التوتال سنة كاملة إن شاء الله , وماضروري كل المقالات تكون جاهزة عشان يبدى لكن في الفترة دي ممكن الناس تبدى تكتب مقالاتها واول مايشتغل اونلاين ويسجلوا يبدو ينزلوا الكلام والموافقة زي ماقلنا بتم من خلال اللجنة وطبعا كل ما الناس اتفاعلت وكتبت كل القوانين المختلفة الموقع بجذب ناس أكتر وبعمل شهرة كويسة وبفيد كل المشاركين وبفيد البلد إن شاء الله يعني بإذن الله العاوز أي خدمة قانونية بلقاها وبلقى المحامي البعملها ليهو .
في نقطة برضو إنه في بعض الناس بلقو نفسم اشتغلو مع محامي في مكة اتسحب منه الترخيص او حاصلة ليهو مشكلة , فعشان الموقع يكون موثوق بتكون في متابعة من خلال اللجنة اللهي بتدينا الاوامر انه فقط نعطل حساب المحامي ده لكن مانمسحه , لحدي مايحل مشكلته ويرجع يتفعل تاني .
حتكون في رسوم اشتراك سنوية لكل محامي مثل برنامج المحامي الذكي يشترك عبارة عن خمسين دولار عن كل سنة وحا تقل بصورة تدريجية عشان تصل 25 كحد أدنى ودي بتضمن إنه الموقع فنياً شغال وسريع وآمن وفي نسخة من الموقع كامل يومية موجودة والدعم الفني شغال بصورة تمام برضو النواحي االتسويقية للموقع والإشهار بتكون من ضمن مسئولياتي والكلام ده كله بكون في عقد ومفصل وأنتم أهل العقود إن شاء الله ومايكون بينا إلا الخير .
نقطة انه الرسوم حاتنقص تدريجياً وبتبدى بخمسين دولار حابي اوضحها , انا كبداية بحجز اسم موقع (نطاق) وإستضافة كويسة ومناسبة , طيب إسم الموقع سنوياً بجدده مابكلف إلا قيمته ومابتغير سعرو بس الإستضافة بتتغير وبتمشي للأعلى منها حسب كمية المشاركين وحسب شهرة الموقع يعني كل مازادو الناس عاوز مساحة اكبر لأنه المقالات والكلام بزيد وكل مابرضو زادو الناس بحتاج سرعة أكبر وامكانيات اكبر عشان كده الإستضافة بتمشي وسعرها بزيد وبرضو النواحي بتاعة إني آخد نسخة يومية وأنظم بتكبر , لكن برضو مع إنه الحاجت دي حاتزيد , عدد المشاركين من المحاميين بزيد ومعناها الرسوم والإشتراكات بتغطي إن شاء الله فلو بقت ماشة كويسة بقدر أحسب الحاجة المناسبة االبقدر انقصها وماتأثر علي فنياً ودي نقطة بترجع لي وحا أدي تصور لو بقى الموضوع , إنه كل مايصل عدد المشتركين باتو رقم أنا بخفض كم وحساباتي شنو والمتوقعا شنو .
بداية كده بحتاج مبلغ من زول يشاركني أو مجموعة من الناس, بنسبة 20% أبدى بيهو الشغل وأعمل تيمي الخاص بالموقع ولو عجبتكم الفكرة وشجعتوها ياريت المهتم بالمشاركة يتواصل معاي ونقعد أوريهو أول الحاجة الحسابات حتكون كيف ومسئولياتو ومسئولياتي شنو عشان بإذن الله تكون شراكة واضحة وناجحة .
أخيراً , كل عام وانتم بخير وياريت ترفعوا البوست ده بالتعليقات عشان أكتر الناس هنا تشوفو وربنا يوفق الجميع .
شاركنا بتعليقك...