عقد الايجار الجديد في القانون المصري
 |
عقد الايجار الجديد في القانون المصري |
محمد أحمد فؤاد - المحامي
لو حضرتك مأجر شقه أو محل أو عقار لشخص وكاتب فى العقد أن مدة الإيجار مشاهره ( يعنى شهر ) أو سنه أو أى فتره محدده وكاتب يجدد العقد من تلقاء نفسه ...
يبقى لازم تخلى بالك ان لو حضرتك محتاج المكان الى انت اجرته يبقى لازم قبل ما مدة الايجار تنتهى تعمل إنذار بعدم رغبتك فى تجديد العقد لمده آخرى ولازم يكون إنذار رسمى مصحوب بخطاب مسجل بعلم الوصول للتأكد من وصول الإعلان للمستأجر ولازم قبل مافترة الإيجار تنتهى .. طيب وحتفرق فى ايه لو الإنذار اتعمل بعد ما فترة الإيجار المحدده فى العقد انتهت ما انا كده كده محدد مدة الإيجار ؟ لا طبعا حتفرق يبقى فى الحاله دى العقد سوف يكون مجدد لفتره آخرى وده حيكون إقرار ضمنى منك بموافقتك على تجديد العقد لفتره مماثله لأن الإنذار اتعمل للمستأجر بعد الفتره المحدده فى العقد ...
علشان كده بنقول ياريت نكتب فى العقد انه لايجوز تجديد العقد من تلقاء نفسه إلا بعقد آخر جديد ... طيب ولو ده حصل والمالك عمل الإنذار بعد ميعاد انتهاء فترة الإيجار ايه الحل ...؟ يبقى فى الحاله دى يزود فى الإنذار إضافة الاجره عن الفتره الجديده إلى المستأجر حيقعد فيها مع تسليمه الشقه خاليه من اى متعلقات .... طيب وايه فائدة الإنذار اصلا ؟ فائدة الإنذار أن حضرتك مش حينفع ترفع دعوى طرد أو فسخ العقد من غيره ولازم تتأكد من صحة الإنذار وبياناته علشان اى خطأ فى الإنذار القضيه حتاخد حكم بعدم القبول وترجع تعيد الإجراءات من الأول ودى مسودة لحكم بتسليم شقه لعدم رغبة المالك فى تجديد العقد وكان مشاهره يعنى يجدد كل شهر من تلقاء نفسه ... وإن شاء الله حنرفع حكم الاستئناف كمان الخاص بهذا الحكم بتأييد حكم اول درجه
شاركنا بتعليقك...